疫苗呢回事，打唔打無得逼，所以我都從來無諗住說服薯媽去打針。之前薯媽話唔打，要睇定啲先打，我當然好尊重。有時睇到疫苗相關嘅消息，佢又同我討論下，佢問我答，佢唔問我都唔答。
有一日，薯媽忽然主動問我：「我係咪都應該打疫苗？」
我話應該，薯媽就話：「好啦，咁你幫我預約。」
薯媽尋日去打針，排隊至打針出嚟，半小時搞掂。打針前姑娘再問一次：「你知唔知今日打邊隻針？」薯媽話：「梗係打復必泰啦，唔好去錯啊～」姑娘忍不住笑咗出嚟，話：「係啊，呢度打復必泰嘅。」
打針後除了手臂針口處有少少肌肉痛，其餘一切正常。無頭痛、無發燒，亦唔覺得特別疲倦。今日係打針後兩日，針口有少許痛，但都無乜大礙，一切都好正常。
之後聽薯媽講電話，同身邊年齡相若嘅朋友講起疫苗，朋友問佢打邊隻，薯媽話：「咁就梗係復必泰啦，另一隻有效率咁低，打嚟把鬼！」
Search